Shairi hili limenitoa chozi. Asante sana Komredi wangu, Issa Shivji

Kwa Kamaradi Wangu Chipukizi

Ida mwanangu
Pokea salamu na pongezi zangu.
Nimeshuhudia ukuaji wako kama binadamu,
Kipenzi cha Hawa zaidi ya Adamu.

Sijui kwa bahati au heshima,
Hapana, sio bahati wala heshima

Georgios na mimi tulikupokea ukuingia duniani,
Bila kupiga hodi wala mbwembwe za ughaibuni.

Nimesema sio kwa bahati wala heshima,
Ni tunda la uhusiano wangu na Baba Ida.
Sio wa damu wala kindugu,
Lakini zaidi ya udugu,
Ni uhusiano wa fikra, itikadi na ukamaradi.

Kwa furaha na matumaini,
Nashudia wako ustahili,
Wa msomi na mhadhiri.
Bila ujeuri na kiburi,
Cha msomi mnafiki.

Uendelee na wako unyeyekevu,
Kuhudumia yako jamii kwa wako upevu.
Nakutakia kila la kheri,
Daima uepukane na hulka ijengayo shari.